27.04.2026 – 29.04.2026

Франкфурт (на Мајна), Германија

Националната агенција за европски образовни програми и мобилност во соработка со Националната агенција од Германија, објавува јавен повик за учество на 4 учесника на активноста за обука и соработка - Европска конференција „Вештини за иднината – училишта за иднината“” која ќе се реализира во Франкфурт (на Мајна), Германија

Тема и цели на настанот:

Во свет што постојано се менува и се развива со забрзано темпо, образованието претставува неопходен компас – клучен за справување со предизвиците на неизвесната иднина. Училиштата сè повеќе се соочуваат со предизвикот да ги осмислат своите образовни пристапи со визија за иднината, со цел да ги оспособат учениците со прилагодливи вештини, критичко размислување и навики за доживотно учење.

Но, како да се постигне тоа? Иако развојот на училиштата често се перципира како сложен и тежок процес, оваа конференција ги поканува учесниците да му пристапат од европска перспектива – ставајќи ја програмата Еразмус+ во срцето на процесот.

Конференцијата има за цел да го претстави широкиот спектар на можности што ги нуди програмата Еразмус+ за создавање средина која поттикнува учење, истражување и активно учество, а со тоа и стекнување и развивање нови вештини. Ќе бидат презентирани успешни проекти за развој на училишта реализирани во рамките на Еразмус+ програмата, како и практични алатки за олеснување на учењето базирано на вештини.

Настанот „Skills for Future – Schools for Future“ е наменет за училишни раководители, наставници и образовен кадар вклучен во развојот на училиштата во земјите учеснички во програмата Еразмус+. Целта е да се даде придонес кон градењето на „Унијата на вештини“.

Учесниците се охрабруваат активно да придонесуваат со споделување на свои идеи и искуства. Ќе има можности за вмрежување и планирање на нови проекти. Потребно е добро познавање на англискиот јазик.

Очекувани резултати:

Ќе бидат презентирани научни перспективи и иновативни Еразмус+ проекти со цел да се прикаже како училиштата можат да имаат придобивки од програмата Еразмус+.

Посебен акцент ќе биде ставен на придобивките од еТвининг – онлајн заедницата во рамките на Еразмус+. Особено во однос на неговиот потенцијал за учење базирано на проекти и концептот еТвининг училишта, оваа платформа нуди иновативни можности за истражување на дигиталната димензија во образованието, истовремено градејќи училишни партнерства низ Европа.

Настанот обезбедува платформа за споделување примери на добра пракса и за развивање нови пристапи за трансформација на училиштата во современи и идно ориентирани средини за учење.

Работилниците, усогласени со различни области на вештини во рамките на Унијата на вештини, ќе им овозможат на учесниците подлабоко да навлезат во темите, да поттикнат продуктивни дискусии и да го постават темелот за развој на сопствени проекти.

Конференцијата ќе прикаже збир на алатки и корисни материјали кои ќе ги поддржат учесниците при адресирање на идните области на вештини во рамките на нивната мисија за развој на училиштата.

Ќе има посебен практичен („hands-on“) дел во кој учесниците ќе можат да започнат со изработка на Еразмус+ проекти (мобилност, соработка и еТвининг проекти), да ги тестираат алатките и материјалите и да го пренесат стекнатото знаење од конференцијата во својата секојдневна пракса.

Водечки прашања:

Како може програмата Еразмус+ да се користи како двигател на иновации и демократско учество во училиштата и за воспоставување училишна клима која поттикнува учење, истражување и активно учество?

Како може Еразмус- да се искористи за унапредување на вештините на училишната заедница и за поддршка на преминот кон поинклузивна и поодржлива средина за учење?

Како можат успешно да се реализираат соработничка работа и комбинирано (blended) учење, и како успешната проектна работа може да се прошири на ниво на целото училиште?

Посебно внимание ќе биде посветено на користењето на еТвининг и во училницата и во комбинирани или онлајн средини, како и на концептот еТвининг училиште.

Како може Еразмус+ да го поддржи развојот на знаења, вештини и вредности неопходни за успешно функционирање со интегритет и отпорност во сè покомплексен свет?

Целна група на учесници:

Оваа конференција има за цел да собере 240 училишни раководители, наставници и педагошки кадар од сите земји учеснички во програмата Еразмус+, вклучени во развојот на училиштата.

Со цел да се обезбеди добра застапеност на различни нивоа на образование – од основно до средно образование, апликациите од различни училишни нивоа ќе бидат соодветно избалансирани.

Профил на учесници: училишни раководители, наставници и образовен кадар (од основно до средно образование) вклучени во развојот на училиштата и со искуство во или интерес за започнување Еразмус+ проекти (со фокус на Клучна акција 1 и 2 и еТвининг) поврзани со темата на конференцијата.

Претставници од институции за обука на наставници, училишни власти и министерства за образование (координатори на мобилни конзорциуми), како и претставници на Еразмус+ наставнички академии кои работат на темата на конференцијата.

Претставници на Еразмус+ проекти (Клучна акција 1 и 2 и еТвининг) кои имаат реализирано или во моментот спроведуваат проекти поврзани со темата на конференцијата и се подготвени да го споделат своето знаење и искуство.

Важна забелешка:

Оваа конференција ќе биде фокусирана исклучиво на училишното образование. Теми поврзани со предучилишно образование и стручно образование и обука (VET) нема да бидат опфатени.

Особено ги охрабруваме апликациите од училишта лоцирани во оддалечени или рурални средини, области со ограничен јавен превоз или слаба инфраструктура, како и урбани предградија каде што многу семејства зависат од социјална помош или живеат во релативна сиромаштија.

ТРОШОЦИ ЗА НАСТАНОТ:

Семинарот ќе се реализира во периодот од 27.04.2026 - 29.04.2026

(27.04.2026 е ден на пристигнување, 29.01.2026 е ден на заминување)

Принципот на покривање на трошоци е следниот:

● Организаторот ќе ги покрие трошоците за: обука, сместување и соодветен број на оброци.

● Патните трошоци се покриваат од Националната агенција која испраќа учесници (во овој случај НА MK01);

Самиот учесник (индивидуално) учествува со 5% од висината на патниот билет (во вид на: билет за локален транспорт, патничко осигурување и сл.)

Крајниот рок за поднесување на апликации е 18.01.2026 година. Аплицирање: https://salto-et.net/events/show/DE03_0803_THO_2026

Забелешка: Известени и контактирани од страна на домаќинот – организатор на активноста за обука и соработка ќе бидат само избраните учесници.

Општи мерки за спречување на корупцијата

Националната агенција за европски образовни програми и мобилност, во постапката за избор на 4 учесника на Активноста за обука и соработка и при извршување на договорите, ќе ги преземе сите потребни мерки со цел навремено откривање на корупцијата и отстранување или намалување на штетните последици од истата.

Доколку постои основано сомнение во врска со корупција во постапката може да пријавите на следната е-пошта: [email protected] и [email protected].